تقهـويتــك وله ... لوما تقهـويتــك بصفر دلال
ـــــــــــــــــــــــــــــــ تهيلتــك هواجيـــس .. وقصـائد حب منـثــوره
اهيجن لك .. بطرقٍ .. غار من مسحــوبه الموال
ـــــــــــــــــــــــــــــــ حديت اغلى مغاتــير الغرام .. وجتك منحوره
تذكــرت الجــــديل اللي تمـــوّج كنّـه الشـــلال
ـــــــــــــــــــــــــــــــ وخد ٍّ يجهر البدر بسنـاه .. ويجــرح غروره
وطهور الرمش يرسم له على الوجنه غطى وظـلال
ـــــــــــــــــــــــــــــــ واذا سلهم يجرِّحه النعاس .. وينقض طهوره
حبيبي ... ما بقى للشعر شيٍ يوصـف وينقــال
ـــــــــــــــــــــــــــــــ ليا أختال الحور بعيون .. مفضوحه ومستوره
سحرني كلّ شيٍ فيك .. والسـحر أغلبه قتـال
ـــــــــــــــــــــــــــــــ وتماديت وذنــوب السحر في القرآن مذكوره
حبيبي ... عاشقك معذور والله لو يجـيه هبـال
ـــــــــــــــــــــــــــــــ اليا صار العشق شيـخٍ يسير العاشق بشـوره
احـبك ايه احـبك ياغنى عمــري وراس المــال
ـــــــــــــــــــــــــــــــ لك بقلبي بساتين .. ومشاتـل حب ممطوره
لطيفك من سموم القيض في عين الوله مقيال
ـــــــــــــــــــــــــــــــ واذا قصّرت .. يعذرني .. ترى كلن وميسوره
أهلّي بالجروح اللي غدا صـدري لها مدهــال
ـــــــــــــــــــــــــــــــ واقلّطها بـــروحٍ من رداة الحظ مقهـــوره
واداري حيرة العبرة .. واكـابر واقهر العـذال
ـــــــــــــــــــــــــــــــ واذا طرّوك قـدامي .. نخيت وقلت .. أخو نوره
انا والله لزومـــات العــواذل والرجـال رجـال
ـــــــــــــــــــــــــــــــ وهل الأمثال قالوا .. يبخص القنـاص بطيوره
ماحـد يـقدر يعلّق في خيــــوط العنكـبوت جبـال
ـــــــــــــــــــــــــــــــ ماحـد يـقدر يهـدّ ديــار لك بالقلب معمـوره
يجونك ناس والدنيا .. معاك ريال تسوى ريال
ـــــــــــــــــــــــــــــــ واجيك ولا معاي الا ّ... قصايد حب منثـوره
الأحد نوفمبر 25, 2007 2:40 pm
